Nakaapekto ang diagnosis ug operasyon ni Pope Leo tungod sa lung cancer sa pagtan-aw sa mga Katoliko sa iyang kahimsog ug pagka-Papa, sumala sa Foreign Minister sa Vatican nga si Archbishop Paul Gallagher.
Sa pakighinabi sa mga tigbalita sa Rome niadtong Martes, Oktubre 27, gihulagway ni Gallagher nga usa kini ka dakong kausaban sa sitwasyon sa Santo Papa.
Gipailalom sa operasyon si Pope Leo niadtong Oktubre 13 diin gikuhaan og bahin ang iyang baga. Sumala sa iyang mga doktor, localized ang cancer ug wala kini mokaylap sa ubang bahin sa lawas, busa dili na kinahanglan ang dugang nga pagtambal.
Samtang, gihisgotan usab ni Gallagher ang bag-ong kasabutan sa hunong-buto tali sa Russia ug Ukraine aron makasulod ang humanitarian aid sa lungsod sa Oleshky nga kontrolado sa Russia.
Bisan nakigsulti na si Pope Leo kang Russian President Vladimir Putin ug Ukrainian President Volodymyr Zelenskyy, wala magtuo si Gallagher nga nalambigit ang Vatican sa paghusay sa maong hunong-buto.
Gihisgotan usab sa arsobispo ang kasabutan tali sa Vatican ug China bahin sa pagtudlo sa mga obispo sa Katolikong Simbahan sa maong nasud. Giila niya nga adunay mga kakulangan ang kasabutan nga unang gipirmahan niadtong 2018 ug naghatag sa mga opisyal sa China og papel sa proseso sa pagpili sa mga obispo.
