Giplano sa Department of Agriculture (DA) nga temporaryong pugngan ang pag-isyu sa import permits alang sa pipila ka produkto sa karne sa baboy sa unang semana sa Nobyembre aron mapanalipdan ang lokal nga mga magbababoy.
Matod ni Agriculture Secretary Francisco Tiu Laurel Jr., gikonsiderar sa ahensya ang paghunong sa pag-isyu sa sanitary and phytosanitary import clearances o SPSIC sulod sa 30 hangtod 60 ka adlaw.
Lakip sa posibleng sakop sa pagdili ang pork belly, ubang parte sa baboy ug tibuok nga baboy. Apan, dili na maapil ang mga kargamento nga napalit na ug anaa na sa biyahe padulong sa nasud aron malikayan ang pagkabalda sa negosyo.
Gihimo kini nga lakang tungod sa kabalaka sa DA nga ang nagkadaghan nga imported nga karne sa baboy naghulga sa panginabuhian sa lokal nga mga magbababoy.
Matod ni Tiu Laurel, naningkamot ang ahensya nga temporaryong limitahan ang pagsulod sa imported nga karne sa baboy aron makabangon ang lokal nga industriya ug malikayan ang dugang nga kapildihan sa mga mag-uuma.
Kinahanglan pa usab nga moagi sa legal nga pagsusi ug makakuha sa hustong pagtugot sa gobyerno ang maong plano sa dili pa kini ipatuman.
