Gihangyo sa pipila ka mga Medical Professionals, nga gipangulohan ni House Deputy Speaker Janette Garin, ang Professional Regulation Commission o PRC nga imbestigahan si Dr. Tony Leachon tungod sa giingong paglapas sa medical ethics.
Sa panagtapok karong Oktubre 26, nagdala ang grupo og mga kahon sa dokumento nga ilang gisumite isip ebidensya sa pormal nga reklamo batok sa doktor.
Matod ni Garin, ang mga pahayag ni Leachon kaniadto may kalabotan sa pagkahadlok sa publiko sa mga bakuna, nga sumala kaniya nakatampo sa pagtaas sa mga kaso ug pagkamatay tungod sa mga sakit sama sa tipdas ug polio.
Gikuwestiyon usab sa grupo ang siyentipikong basehan sa mga pahayag ni Leachon, ang gilapdon sa iyang propesyonal nga kahanas, ug ang iyang mga komento batok sa ubang doktor, lakip na ang iyang mga pahayag niadtong 2017 atol sa kontrobersiya sa Dengvaxia.
Samtang, masaligon si Dr. Julius Lecciones, usa ka consultant physician nga sakop sa grupo, nga mohimo ang PRC sa angay nga lakang base sa ilang gisumite nga ebidensya.
Sa iyang bahin, gipatin-aw ni Leachon nga ang iyang adbokasiya nakasentro sa pagpanalipod sa mga pasyente ug pagpangita sa kamatuoran sa panglawas sa publiko.
Iyang gilimod nga ang iyang mga pahayag bahin sa Dengvaxia gituyo aron mangdaot, ug gibug-atan ang kamahinungdanon sa accountability, transparency ug patas nga imbestigasyon.
