Gisugyot ni Sen. Panfilo “Ping” Lacson nga ang mga hearing sa bicameral conference committee magpabiling live streaming bisan kon ang sesyon gisuspinde aron malikayan ang mga kuwestiyonableng panaghisgot ug negosasyon luyo sa mga kamera samtang hisgotan ang proposed 2027 national budget.
Matod ni Lacson, importante nga makita sa publiko ang nahitabo sa bicameral conference committee o bicam, diin ang mga representante sa Senado ug House of Representatives nag-reconcile sa ilang tagsa-tagsa ka bersiyon sa proposed national budget.
Dugang pa sa senador nga sa miaging tuig, daghan ang nasuspenso sa bicam hearings, diin posibleng nag-istoryahanay ang mga magbabalaod sa mga suok nga dili maabot sa camera.
Gawas sa padayon nga livestream, nanawagan usab ang senador nga paubsan ang mga suspension sa bicam tungod kay magamit kini sa mga estorya nga dili mabantayan sa publiko.
Matod niya, ang sesyon kinahanglang suspensuhon lang kon gikinahanglan, sama sa pagpahuway o pag-adto sa kasilyas, ug dili ang pribadong diskusyon o mga tanyag sa mga probisyon sa budget.
Ang sugyot ni Lacson nunot sa iyang panawagan sa mas estrikto nga pagsusi sa nasudnong budget ug pagsumpo sa mga kuwestiyonableng alokasyon.
Una na usab niyang gibutyag ang giingong tanyag nga P5-million nga “allocation fund” nga gi-attribute sa Technical Education and Skills Development Authority (TESDA). Si TESDA Director-General Jose Francisco “Kiko” Benitez mihimakak nga iyang gitugutan ang maong tanyag alang sa senador.
Ubos sa bicam, gi-reconcile sa mga magbabalaod ang lain-laing bersyon sa gisugyot nga budget sa dili pa isumiter alang sa ratipikasyon sa duha ka balay sa Kongreso.
Tungod niini, importante ang transparency niining yugtoa aron mabantayan sa publiko ang mga kausaban sa alokasyon sa pundo sa lungsod.
