Nagsumite na ang prosekusyon sa Kamara sa mga ebidensiya batok kang Vice President Sara Duterte sa wala pa ang gitakdang deadline niadtong Oktubre 23, samtang nagpahayag kini og pagsalig nga makombikto ang Bise Presidente sa impeachment trial.
Matod ni House impeachment spokesperson Robert Ace Barbers, gisumite ang formal offer of evidence niadtong Oktubre 21, busa adunay 10 ka adlaw ang depensa aron mosumite og komento sa dili pa magdesisyon ang Senate Impeachment Court kon dawaton ba ang mga ebidensiya.
Nakasentro ang kaso sa Article II sa impeachment complaint, nga naglangkob sa mga alegasyon sa unexplained wealth, sayop nga deklarasyon sa Statement of Assets, Liabilities and Net Worth o SALN, ug gidili nga interes sa negosyo.
Base sa testimonya ni financial forensic expert Alexander Cabrera, gibanabana nga mokabat sa P817.87 million ang giingong dili mapaklaro nga bahandi nila Duterte ug sa iyang bana nga si Manases Carpio gikan sa 2022 hangtod 2025. Posible usab nga mosaka sa P1.5 billion ang kantidad base sa mas lapad nga pagkalkula.
Gilimod ni Duterte ang mga alegasyon batok kaniya, samtang gikatakdang magsugod ang iyang depensa sa pagpresentar sa mga ebidensiya sa Nobyembre 9.
