GENSAN- Patay ang duha ka drayber human nga magbanggaay ang ilang mga motorsiklo sa Fil-Am Road, Barangay Fatima Uhaw, General Santos City, alas 10:40 sa gabii, Oktubre 24, 2026.
Giila ang mga biktima nga si Randolph Demataga Abad, 34 anyos, minyo ug residente sa Purok Calatao, Barangay Tambler, ug si Joshua Andaya, 14 anyos, ulitawo ug residente sa Acharon Compound, Barangay Dad West, ning siyudad.
Base sa imbestigasyon sa kapulisan, nagsugat ang duha ka motorsiklo nga nagbiyahe sa magkaatbang nga direksyon ug giingong kusog ang ilang dagan sa dihang nahitabo ang head-on collision o frontal nga pagbangga.
Gikumpirma sa mga responder sa ambulansya nga namatay ang duha ka drayber sa nahitabong aksidente, samtang sumala sa inisyal nga report, wala sila magsul-ob og helmet sa dihang nahitabo ang insidente.
Gikustodiya na sa kapulisan ang mga motorsiklo alang sa dokumentasyon ug dugang nga imbestigasyon sa maong aksidente.
