Gihulagway sa aktres nga si Lovi Poe nga brutal ug puno sa mga sakripisyo ang iyang unang tuig isip usa ka inahan, apan matud pa niini, dili niya ibaylo sa bisan unsa ang matag higayon nga iyang naagoman uban sa iyang anak.
Sa usa ka interbyu atol sa eksklusibong paglusad sa iyang koleksiyon nga “The Art of You” sa Mandaluyong City, nahinumdom si Lovi sa kakapoy sa pag-atiman sa iyang anak, lakip na ang pagpakaon ug pagpatulog niini matag pipila ka oras.
Matud sa aktres, paspas kaayo ang paglabay sa panahon ug nalipay siya sa pagkakita sa pagtubo sa iyang anak, bisan pa nga gusto usab niyang pahimuslan ang matag gutlo sa pagkabata niini.
Bisan bag-o pa lang nahimong inahan, nakabalik dayon si Lovi sa pagtrabaho ug nakahuman na og duha ka pelikula ug usa ka serye sa telebisyon sulod sa wala pay usa ka tuig.
Gipaambit usab niya nga duha ka tuig nga gihimo ang iyang “The Art of You” nga koleksiyon, diin kinahanglan niyang balansehon ang pag-atiman sa anak ug ang pagtuman sa mga ‘deadline’ sa trabaho samtang nagpasuso.
Bisan pamilya ang iyang prayoridad, gihatagan usab ni Lovi og importansiya ang paghigugma sa kaugalingon ug paggahin og panahon alang sa iyang kaugalingong kalipay, kumpiyansa ug kaayohan.
