GENSAN- Gipadayag ni Vice Mayor Edmar Yumang ang panginahanglan sa hugot nga pagsunod sa desisyon sa Korte Suprema kalabot sa paggamit sa ‘unprogrammed appropriations’ kon matuman ang gitakdang kondisyon sa pagpagawas niini.
Kini human ideklara sa Korte Suprema niadtong Oktubre 20 nga ‘unconstitutional’ ang pipila ka probisyon sa 2024 ug 2025 national budget, lakip ang dugang P449.5 billion sa unprogrammed appropriations sa 2024 budget ug P17.99 billion nga dugang sa Special Road Fund sa 2025 budget.
Matud ni Yumang, dili na angay ipadayon ang pagpatuman sa mga probisyon sa 2026 budget nga gideklarang unconstituonal sa korte, ug kon nagsugod na ang pagpatuman niini, kinahanglan kining hunongon.
Gipasidan-an niya nga ang mga opisyal ug ahensiya sa gobyerno nga mopatuman sa maong mga probisyon kinahanglan nga mahimong manubag sa kriminal ug administratibong paagi.
Gihingusgan usab ni Yumang ang kamahinungdanon sa ‘fiscal accountability’ ug pagpanalipod sa pondo sa katawhan aron masiguro nga ang paggasto sa gobyerno adunay lig-on nga legal nga basehan ug dili makadaot sa disiplina sa nasudnong panalapi.
