Tumong sa House prosecution panel nga ipasa sa dili pa ang gitakdang deadline sa Oktubre 23 ang pormal nga pagtanyag sa mga ebidensiya batok kang Vice President Sara Duterte aron mapadali ang nahibiling proseso sa impeachment trial sa Senado.
Matod ni House prosecutor Joel Chua, giandam na sa panel ang mga dokumento ug uban pang ebidensiya nga ilang gustong dawaton ug ikonsidera sa impeachment court. Adunay 10 ka adlaw ang depensa gikan sa pagdawat niini aron mosumite sa ilang mga komento ug pagsupak.
Sa testimonya sa forensic accounting expert nga si Atty. Alexander Cabrera, gibanabanang mikabat sa P817.87 million ang giingong dili mapatin-aw nga bahandi nga nalambigit kang VP Sara ug sa iyang bana nga si Manases “Mans” Carpio gikan sa 2022 hangtod 2025. Posible pa kini nga mosaka sa P1.5 billion base sa laing pamaagi sa pagkalkula.
Gibase ni Cabrera ang iyang pagsusi sa mga rekord sa bangko, income tax return, mga dokumento sa insurance, corporate filing ug Statement of Assets, Liabilities and Net Worth (SALN).
Niadtong Oktubre 13, gidawat sa Senate impeachment court ang pag-atras sa prosecution sa tulo ka artikulo nga may kalabotan sa giingong sayop nga paggamit sa confidential funds, bribery ug grave threats. Tungod niini, ang alegasyon bahin sa dili mapatin-aw nga bahandi na lamang ang nahibiling hisgotan.
Gikatakdang ipadayon ang pagtaral sa Nobyembre 9, diin gilauman nga ipresentar sa depensa ni VP Duterte ang ilang mga ebidensiya, depende sa mahimong desisyon sa impeachment court bahin sa pormal nga pagtanyag sa mga ebidensiya sa prosecution.
