Miabot sa hawak ang tubig-baha sa Mabuhay Underpass sa General Santos City kagabii, Oktubre 14, human sa kusog nga pag-ulan sa siyudad.
Base sa impormasyon alas-9:12 sa gabii, misaka ang tubig sa maong underpass ug nakapalisod sa pag-agi sa mga motorista ug pedestrian. Nahimo pa hinuong daw mini-resort ang maong lugar human adunay mga tawo nga nanglangoy sa natigom nga tubig-baha.
Samtang karong adlawa, Oktubre 15, gilimpyohan na ang maong lugar pinaagi sa clearing operations aron matangtang ang mga sagabal ug mabalik sa normal ang kahimtang sa agianan.
Giawhag ang publiko nga mag-amping sa pagbiyahe, ilabina panahon sa kusog nga pag-ulan, ug likayan ang paglusong o paglangoy sa tubig-baha tungod sa posibleng mga peligro nga dili makita sa ilawom niini.
