GENSAN- Nagtuo si Atty. Dominador Lagare Jr. sa College of Law sa Mindanao State University-General Santos City nga mahimong lisod alang sa kampo sa depensa ni Vice President Sara Duterte ang pagpresentar sa ilang mga ebidensya sa nagpadayong impeachment proceedings batok sa bise presidente.
Matod ni Lagare, lig-on ang mga ebidensyang gipresentar sa prosekusyon kalabot sa Articles 1, 2 ug 4 sa impeachment complaint, samtang wala na gipadayon ang Article 3 nga may kalabotan sa bribery.
Gipahayag usab ni Lagare nga dugay na ang proseso sa impeachment tungod kay milabay na ang pipila ka bulan sukad kini gisugdan, apan ang prosekusyon pa lamang ang nakapresentar sa ilang mga ebidensya.
Dugang pa niya, sukad pa sa pagdungog sa House of Representatives alang sa pagtino sa ‘probable cause’, wala pa niya makita ang mga ebidensyang mahimong ipresentar sa depensa aron tubagon ang mga alegasyon batok kang Duterte.
Gilauman ni Lagare nga ipatin-aw sa kampo sa depensa ang mga alegasyon kalabot sa confidential funds, lakip ang isyu sa paggamit sa alyas nga si Mary Grace Piattos, ingon man ang mga alegasyon sa grave threats.
