Padayon nga nagkalapad ang sakop sa African Swine Fever o ASF sa nasud human gikumpirma sa Department of Agriculture o DA nga miabot na sa 92 ka barangay ang naapektuhan sa maong sakit sa mga baboy.
Matud ni DA Assistant Secretary Arnel de Mesa, ang pagsaka sa ihap sa mga apektadong lugar tungod sa padayon nga pagkaylap sa virus sa mga lugar nga adunay aktibong kaso, lakip na ang mga bag-ong kaso nga natala sa pipila ka rehiyon.
Padayon usab ang koordinasyon sa ahensya uban sa mga lokal nga panggamhanan aron mamonitor ug mapugngan ang pagbalhin o pagsulod sa mga baboy nga posibleng apektado sa sakit.
Hugot nga gipatuman sa DA ang quarantine checkpoints ug ang pagdili sa pagbiyahe o pagtransportar sa mga buhing baboy, karne nga walay hustong dokumento, ug mga produktong baboy gikan sa mga red zone ngadto sa mga lugar nga luwas pa sa ASF.
Gipahinumdoman usab ang mga hog raiser nga hugot nga ipatuman ang mga biosecurity measures sa ilang mga babuyan, lakip na ang regular nga pag-disinfect ug pagdili sa pagsulod sa mga dili awtorisadong tawo.
Sa pagkakaron, nagpatuman ang DA og targeted culling o pagpatay sa mga baboy sulod sa usa ka kilometro nga radius gikan sa apektadong babuyan aron mapugngan ang dugang nga pagkaylap sa virus.
Nanawagan usab ang ahensya sa publiko ug sa mga nagbuhi og baboy nga i-report dayon sa ilang munisipyo o lokal nga buhatan sa agrikultura kung makamatikod og mga dili kasagarang sintomas o kalit nga pagkamatay sa ilang mga binuhing baboy.
