Mihinay ngadto sa 6.1 porsyento ang inflation rate niadtong Agosto kumpara sa 6.2 porsyento niadtong Hulyo.
Apan nagpabiling pagkaon ang pinakadakong hinungdan sa pagtaas sa gasto sa matag pamilyang Pilipino, nga mitampo og hapit tulo ka porsyento sa kinatibuk-ang inflation rate sa tibuok nasod.
Nakatabang sa paghinay sa food inflation, nga mikunhod ngadto sa 4.6 porsyento, ang dakong pag-ubos sa presyo sa mga utanon, root crops ug saging. Mihinay usab gamay ang pagsaka sa presyo sa isda sa mga merkado.
Samtang misaka usab ang presyo sa ubang importanteng palaliton sama sa mga prutas ug pan. Misaka usab ngadto sa 19.4 porsyento ang inflation sa bugas tungod sa pagsaka sa presyo sa abono ug pagka-ulang sa pagbiyahe sa mga suplay.
Kalabot niini, gipasaligan ni Agriculture Secretary Francisco Tiu Laurel Jr. nga igo ang suplay sa bugas sa nasod tungod sa mga naani nang palay ug sayong pag-import isip pagpangandam sa El Niño.
Nagpasidaan usab ang ahensya nga ang pagbaha nga dala sa mga bagyong miigo bag-o lang mahimong hinungdan sa bag-ong bottleneck ug temporaryong pagtaas pag-usab sa presyo sa mga utanon ug isda.
Tungod niini, gipaspasan ang pagbiyahe sa mga suplay ug pag-ayo sa mga nadaot nga umahan aron mapabiling barato ug maabot sa matag pamilyang Pilipino ang presyo sa pagkaon.
