Kapin 1,700 ka estudyante ug magtutudlo sa Indonesia nagsakit tungod sa gituohang food poisoning human mokaon og libreng pagkaon nga gipanghatag isip kabahin sa government meal program.
Pinakabag-ong insidente ang natala sa usa ka senior high school sa Lasem, Central Java, diin 752 ka estudyante ug 25 ka magtutudlo ang nakaeksperyensya og kalibanga ug pagsuka human mokaon sa libreng pagkaon niadtong Miyerkules.
Sumala sa school principal sa maong eskwelahan, apil sa pagkaon ang grilled chicken. Namatikdan matod pa sa food taster nga adunay pipila ka manok nga lapot o “slimy” sa wala pa kini ipanghatag.
Samtang, matud sa doktor nga mitambal sa mga biktima, 15 ka estudyante ug magtutudlo ang gikinahanglang dad-on sa ospital.
Gawas sa insidente sa Lasem, 664 ka estudyante ang nasakit sa Sidoarjo, East Java, samtang 49 sa Nganjuk ug 237 sa Agam, West Sumatra, ang gikatahong naigo sa food poisoning karong semanaha.
Tungod niini, misaka sa kapin 1,700 ang gidaghanon sa mga nasakit sa magkabulag nga insidente nga gikonekta sa libreng meal program.
Gipangulohan sa National Nutrition Agency ang maong programa nga gilunsad ni Indonesian President Prabowo Subianto niadtong miaging tuig aron makatabang sa nutrisyon sa minilyon nga mga bata.
Samtang, giingon sa usa ka magbabalaod nga dili angay isipon nga magkabulag lamang nga insidente ang mga kaso ug kinahanglan sulbaron ang problema sa sistema sa pagpatuman sa maong programa.
