GENSAN- Gipasabot ni Atty. Rey Cartojano nga ang prosecution team maoy adunay dakong responsibilidad sa pag-establisar sa mga ground sa impeachment batok kang Vice President Sara Duterte.
Kini human gipahayag ni Senate Presiding Officer Francis “Chiz” Escudero nga posible nga ang impeachment court mismo ang magpatawag og mga witness, kung gikinahanglan, imbes nga ang prosecution o defense team ang maoy magpresentar kanila.
Matud ni Cartojano, medyo lahi kini sa naandan nga proseso sa regular nga korte, apan gitugotan sa impeachment rules ang maong pamaagi.
Gipunting usab sa abogado ang posibilidad nga ipatawag sa prosecution si Colonel Raymund Dante Lachica, nga mahimong i-presentar isip hostile witness aron mas klaro ang pipila ka isyu nga mitungha atol sa impeachment trial.
Matud pa ni Cartojano, kung tinuod nga gusto sa prosecution nga maestablisar ang kamatuoran, mahimo nilang ipatawag si Lachica bisan pa og mahimong adunay mga pangutana o isyu nga motumaw atol sa iyang pagpamatuod.
Sa bahin sa depensa, gilauman usab nga makapresentar kini og mga saksi ug ebidensiya aron tubagon o ipanghimakak ang mga alegasyon nga ipresentar sa prosecution.
Apan dugang pa ni Cartojano nga sa kasamtangang dagan sa impeachment trial, naa pa sa prosecution ang katungdanan nga magpamatuod ug mag-establisar sa mga ground sa impeachment.
Kung mapamatud-an na sa prosecution ang ilang mga alegasyon, didto na mosulod ang depensa aron ipresentar ang ilang mga saksi ug ebidensiya nga mahimong makapahuyang sa mga argumento sa prosecution.
