Gihangyo ni TINGOG Party-list Rep. Jude Acidre ang gobyerno nga dugangan ang reimbursement o bayad balik sa mga State Universities and Colleges o SUCs aron masiguro nga igo ang pondo alang sa kalidad nga edukasyon.
Matud ni Acidre, angay pagtuonan ang pagtaas ug pag-uniporme sa tuition rate sa mga SUC ngadto sa 200 pesos kada unit.
Apan gipatin-aw niya nga dili kini angay ipasa ngadto sa mga estudyante tungod kay libre ang tuition ubos sa Free Higher Education o FHE program, ug ang gobyerno ang responsable sa pagbayad niini.
Gipakita sa Commission on Higher Education o CHED nga nagkalainlain ang tuition rates sa mga SUC. Adunay ubang eskwelahan nga 50 pesos lamang kada unit ang bayranan, samtang ang uban moabot hangtod 1,000 pesos kada unit.
Sumala sa CHED, gikinahanglan og dugang nga 2.4 bilyon pesos aron mapataas ngadto sa 200 pesos kada unit ang tuition reimbursement alang sa mga SUC nga ubos niini nga kantidad.
Gipasiugda ni Acidre nga importante ang igo nga reimbursement tungod kay daghan pa gihapon nga SUC ang nanginahanglan og dugang nga pondo alang sa mga classroom, magtutudlo, kagamitan ug uban pang pasilidad.
Gipahibalo usab sa CHED nga 68 porsyento sa 541 ka SUC ug campuses nga ilang unang gisusi ang milapas na sa gibanabanang kapasidad sa ilang enrollment.
Gipasiugda ni Acidre nga ang libreng kolehiyo dili lamang kutob sa walay tuition fee. Kinahanglan usab masiguro sa gobyerno nga igo ang mga panginahanglanon sa mga SUC aron makahatag sila og kalidad nga edukasyon.
