Nanawagan si Parañaque Representative Brian Yamsuan sa Department of Education o DepEd ug Kongreso nga palig-onon ang pagpatuman sa Good Manners and Right Conduct o GMRC ug Values Education aron mas mapalig-on ang moral nga pundasyon sa mga kabatan-onan sa nasod.
Matod ni Yamsuan, dili lamang pagkat-on sa maayong pamatasan ang tumong sa GMRC, kundili ang paghulma usab sa mga kabatan-onan aron mahimong mga lungsoranong adunay maayong kinaiya ug hustong pamatasan.
Gihimo niya ang maong panawagan human sa mga insidente sa bullying ug kapintasan sa mga eskwelahan, lakip na ang mga pagpusil sa mga estudyante sa Zamboanga City ug Tacloban City.
Giingon ni Yamsuan nga dili igo ang GMRC aron hingpit nga masulbad ang kapintasan sa mga eskwelahan, apan usa kini sa importanteng pundasyon sa pagpalambo sa kinaiya ug pamatasan sa mga kabatan-onan.
Gihangyo usab niya nga repasuhon ang pagpatuman sa GMRC and Values Education Act, Anti-Bullying Act ug mga balaod alang sa mental health sa mga estudyante.
