Gilimod sa aktres ug television host nga si Shaira Diaz nga siya karon buntis, samtang prangka usab niyang gibutyag ang iyang pakigbisog batok sa Polycystic Ovary Syndrome o PCOS nga maoy usa sa mga hinungdan sa iyang pagdugang og timbang.
Sa iyang Facebook post, giangkon ni Shaira nga nakamatikod siya sa pagtaas sa iyang timbang ug lisod alang kaniya ang pagpaniwang tungod sa metabolic ug hormonal issues nga konektado sa iyang PCOS, lakip na ang insulin resistance ug hormonal imbalances.
Nanghinaut usab si Shaira nga mas mahimong malumo ug sensitibo ang mga netizen sa ilang pagkomento sa lawas sa ubang tawo, tungod kay dili matagna sa uban ang personal nga pakigbisog nga giatubang sa usa ka indibiduwal.
Matod pa niya, nasakitan siya sa pipila ka mapintas ug walay konsiderasyong komento mahitungod sa iyang lawas ug gibug-aton.
Giklaro usab sa actress nga dili pa siya buntis karon, bisan pa og adunay mga nagpakaylap sa maong impormasyon. Giingon niyang ipahibalo ra nila sa publiko ang maayong balita kon panahon na niini.
Si Shaira naminyo sa iyang longtime boyfriend nga aktor nga si EA Guzman, diin nagpakasal ang duha niadtong 2025.
