Gikumpirma sa HYBE ug Geffen Records ang pagbalik sa Filipina member sa international girl group nga ‘KATSEYE’ nga si Sophia Laforteza sa Enero 2027.
Sumala sa duha ka kompanya, mobalik si Laforteza sa mga kalihokan sa grupo sa unang semana sa Enero.
Giklaro usab nga dili siya makaapil sa nahibiling mga kalihokan sa grupo karong tuiga, lakip na ang ‘THE WILDWORLD TOUR’ sa North America, tungod kay iyang giuna ang pag-atiman sa iyang panglawas ug kaayohan.
Gipasalamatan usab sa management ang mga fans nga nailhang “EYEKONS” tungod sa ilang padayon nga suporta ug pagsabot samtang naghulat sa mga bag-ong pahibalo kalabot kang Laforteza.
Samtang, wala pa’y bag-ong pahibalo kalabot sa kahimtang sa laing miyembro nga si Manon Bannerman, nga mihunong usab sa mga kalihokan sa grupo sukad Pebrero ning tuiga.
Namatikdan nga mipahulay si Laforteza niadtong Agosto aron magpokus sa iyang mental health ug kinatibuk-ang kahimsog.
