Naghimo og inspeksyon ang General Santos City Police Office o (GSCPO) niadtong Agosto 23 sa mga police personnel nga gitahasan sa safety coverage alang sa pag-abli sa Tuna Festival 2026 sa General Santos City.
Personal nga gisusi ni Acting City Director PCOL. ARIEL B. ALCALA , ang kahimtang ug kaandam sa mga personnel nga gitahasan sa pagmintinar sa seguridad sulod ug palibot sa festival area.
Gipunting sa maong inspeksyon ang hustong deployment sa mga pulis, police visibility alertness ug police readiness aron masiguro ang kalinaw ug seguridad sa mga vendor, bisita ug sa publiko.
Gipahinumdoman usab ni PCOL. ACALA ang mga personnel nga magpabiling mabinantayon, alerto, dali maduolan sa publiko ug andam sa pagresponde kon adunay insidente o panginahanglan panahon sa mga kalihokan.
Kabahin kini sa mga lakang sa GSCPO alang sa safety coordination, pagpalig-on sa police visibility, pagmintinar sa public order ug paspas nga pagresponde sa bisan unsang insidente atol sa Tuna Festival.
Samtang, nanawagan ang kapulisan sa publiko nga magpabiling alerto samtang nagpadayon ang mga aktibidad sa Tuna Festival ug likayan ang pagdala o paggamit og mga butang nga mahimong hinungdan sa peligro sulod sa festival area.
Gihangyo usab ang mga bisita ug mga residente nga mosunod sa mga security protocols ug motaho dayon sa mga awtoridad kon makamatikod og kaduda-dudahang lihok aron mapadayon ang kalinaw ug kahapsay sa selebrasyon.
