Giklaro sa Department of Education o DepEd nga P89.9 milyon ang ilang budget karong tuiga alang sa Child Protection Program, ug dili P89.9 bilyon sama sa unang napahayag ni Lanao del Sur Representative Zia Alonto Adiong.
Sumala sa DepEd, sakop sa maong programa ang nagkalain-laing preventive initiatives sama sa paghimo og mga polisiya, session guides ug training programs.
Tumong niini nga mapalig-on ang pagpanalipod sa katungod sa mga estudyante ug masangkapan ang mga personnel sa hustong kahibalo ug abilidad aron matubag ang mga kabalaka sa mga learner, subay sa mga protocol ug guidelines.
Una nang gihisgutan ni Adiong ang pondo sa DepEd ubos sa 2026 General Appropriations Act, lakip na ang budget alang sa Child Protection Program, atol sa press conference nga may kalabotan sa mga insidente sa kapintasan sulod sa mga eskwelahan.
Apan giklaro sa DepEd nga P89.9 milyon, ug dili P89.9 bilyon, ang aktuwal nga pondo alang sa maong programa karong 2026.
