Gideklarar nga state of calamity ang 88 ka lugar sa Pilipinas tungod sa epekto sa habagat ug sa mga bagyong Luis ug Maymay nga miigo sa nasud, sumala sa Office of Civil Defense o OCD.
Sa update nga gipagawas sa ahensya karong Biyernes, Agosto 21, lakip sa mga lugar nga gideklarar nga state of calamity ang pipila ka dapit sa Luzon.
Lakip niini ang Dagupan City, Santa Barbara, Mangaldan, Bugallon ug Mangatarem sa Pangasinan; tibuok probinsya sa Bataan, Bulacan ug Pampanga; Masinloc sa Zambales; Rodriguez sa Rizal; tibuok probinsya sa Cavite; ug Nasugbu sa Batangas.
Ubos sa state of calamity, mas mapadali sa gobyerno ang pagpagawas sa emergency funds sama sa Quick Response Fund. Makontrol usab ang presyo sa mga importanteng panginahanglanon aron malikayan ang pagpahimulos sa mga negosyante, mapugngan ang hoarding ug mapadali ang relief, rescue ug rehabilitation alang sa mga apektado sa kalamidad.
May kalabotan niini, hugot usab nga gipatuman sa Department of Trade and Industry o DTI ang price freeze o pagdili sa pagpatuyang og pataas sa presyo sa mga importanteng palaliton sa mga lugar nga gideklarar nga state of calamity, subay sa Republic Act No. 7581 o Price Act.
Ubos sa maong balaod, ang presyo sa mga essential goods magpabilin sa ilang prevailing price sulod sa 60 ka adlaw, gawas kon sayo kining i-lift.
Sa pagkakaron, mikabat na sa 29 ka tawo ang namatay tungod sa mga kalamidad, samtang 19 ang nasamdan ug tulo ang gikatahong nawala.
Naapektuhan usab ang mokabat sa 1.9 milyon ka pamilya o katumbas sa 6.6 milyon ka indibidwal, diin ang uban nagpabilin gihapon sa mga evacuation center.
Dako usab ang kadaot nga gibilin sa sunod-sunod nga kalamidad sa sektor sa agrikultura ug imprastraktura.
