Nagplano ang aktres nga si Bianca Umali nga ipadayon ang iyang pag-eskwela human niya unahon kaniadto ang pagpa-eskwela sa iyang pinsan nga si Samantha.
Gipaambit ni Bianca sa usa ka podcast nga gipili niya kaniadto nga suportahan una ang edukasyon sa iyang pinsan kaysa sa iyang kaugalingon.
Apan karon nga naka-graduate na si Samantha, miingon ang aktres nga panahon na usab nga hatagan niya og higayon ang iyang kaugalingon nga makapadayon sa pagtuon.
Matud ni Bianca, duha ang iyang gikonsiderar—ang pag-eskwela sa usa ka design school alang sa interior design o ang pag-enrol sa usa ka dakong unibersidad.
“I have two choices. Either I go to a design school for interior design, or I’m also looking into a big university,” matud niya, samtang miangkon nga wala pa siya makahukom kung asa gyud siya moeskwela.
Gipasabot usab ni Bianca nga gusto niyang makabalos pinaagi sa pagtabang sa iyang pinsan, isip pagpasalamat sa iyang Lola Vicky nga maoy nag-atiman kaniya sukad sa pagkabata.
Matud pa niya, kung igo lamang ang iyang kapasidad aron silang duha sa iyang pinsan makapadayon sa pag-eskwela sa samang higayon, iyang buhaton kini. Apan iyang giila nga mahal ang paggasto sa edukasyon karon.
Nagtuo usab ang aktres nga dili gayod ulahi alang kang bisan kinsa ang pag-eskwela.
Nakahuman si Bianca sa senior high school niadtong 2019.
Nagdako siya ubos sa pag-atiman sa iyang Lola Vicky human siya nawad-an og inahan sa edad nga lima ka tuig, ug namatay usab ang iyang amahan paglabay sa lima ka tuig.
