Dili moubos sa 22 ka tao ang gikumpirmang namatay human miigo ang kusog nga magnitude 7.7 nga linog sa Flores Island sa Indonesia kaganihang buntag, Agosto 15.
Padayon ang grabeng operasyon sa mga rescuers aron pangitaon ang mga posibleng buhi nga natrap ilawom sa mga guba nga estruktura.
Sumala sa rescue official nga si Fathur Rhaman, 20 na ang kumpirmadong namatay gikan sa upat ka lungsod sa isla nga ilado isip destinasyon sa mga turista.
Lakip sa mga narekober sa mga rescuers ang usa ka wala nay kinabuhi nga tao gikan sa mga guba sa usa ka building nga partially nga naguba duol sa pantalan sa Maumere.
Duha ka tao usab ang naluwas gikan sa mga debris, apan adunay usa nga nakit-an nga patay.
Dugang pa, unom ang gikatahong nasamdan ug duha pa ang wala makit-i ug gituohang buhi nga natrap ilawom sa mga guba sa kasikbit nga Manggarai Regency. Ang Nagekeo Regency mao ang giisip nga pinakagrabeng naapektuhan sa linog tungod kay kini ang pinakaduol sa epicenter nga nahimutang sa amihanang baybayon sa Flores Island.
Matud sa rescue officials, gipunting karon sa mga rescue team ang pagpangita sa mga tao nga posibleng nalubong ilawom sa mga guba nga building.
Apan nahimong mas komplikado ang operasyon tungod sa mga landslide nga nakaputol sa pipila ka mga dalan.
Ang Indonesia ug mga kasikbit nga nasod kanunay makasinati og mga linog tungod sa ilang lokasyon sa Pacific “Ring of Fire,” usa ka lugar nga adunay taas nga kalihokan sa seismic.
