Opisyal nang miretiro sa National Basketball Association (NBA) ang “Triple-Double King” nga si Russell Westbrook human sa 18 ka season sa liga. Gipili sa beteranong point guard ang pagretiro bisan pa og nakadawat siya og mga tanyag gikan sa nagkadaiyang mga koponan para sa 2026-2027 season, lakip ang Sacramento Kings ug Washington Wizards.
Napili si Westbrook isip fourth overall pick sa 2008 NBA Draft sa Seattle SuperSonics, apan wala siya makaduwa sa Seattle tungod kay mibalhin ang prangkisa ngadto sa Oklahoma City, diin niya gisugdan ang iyang NBA career.
Miabot og 11 ka season ang iyang pagdula alang sa Oklahoma City Thunder, kauban nila Kevin Durant ug James Harden, ug nakaabot sila sa NBA Finals niadtong 2012 apan napildi sa Miami Heat. Sa 2016-2017 season, nahimong MVP si Westbrook human siya nakarekord og triple-double average nga 31.6 points, 10.7 rebounds ug 10.4 assists matag duwa.
Sa katapusang pito ka season sa iyang career, nagdula siya alang sa Houston Rockets, Washington Wizards, Los Angeles Lakers, Denver Nuggets ug Sacramento Kings.
Sa iyang kataposang season niadtong 2025-2026, nakadula siya sa 58 ka duwa alang sa Kings ug nakarekord og average nga 15.2 points, 6.7 assists ug 5.4 rebounds matag duwa.
Sa iyang pagretiro, hawiran gihapon ni Westbrook ang franchise records sa Thunder alang sa career points, assists, rebounds ug steals, samtang ikalima siya sa tanang panahon sa NBA sa career assists ug nanguna sa liga sa pinakadaghan nga triple-doubles.
