Gipahibalo sa NBA star nga si Russell Westbrook ang iyang pormal nga pagpensiyon sa pagdula sa basketball.
Sa iyang social media account, nag-post kini og video diin gibasa sa aktor nga si Michael B. Jordan ang pipila ka mensahe gikan sa 37-anyos nga si Westbrook.
Sulod sa 18 ka NBA season, nakaduwa si Westbrook sa pito ka mga koponan.
Human sa duha ka tuig nga college career sa University of California, Los Angeles, napili siya isip ika-14 nga pick sa 2008 NBA Draft sa Seattle SuperSonics, apan wala siya makaduwa alang niini nga koponan.
Naggugol siya og 11 ka season sa Oklahoma City Thunder, nga mao ang bag-ong ngalan sa SuperSonics, diin nakatambal niya sila Kevin Durant ug James Harden.
Gipangulohan nila ang Western Conference title niadtong 2012, apan napildi sila sa Miami Heat sa NBA Finals.
Sa Game 4 sa Finals, nakapuntos siya og 43 puntos. Niadtong panahona, 23 anyos pa lamang siya ug maoy nanguna sa scoring, assists, rebounds ug steals.
Nakaangkon siya og meniscus tear sa first round sa 2013 playoffs, samtang si Durant nakaangkon og foot fracture nga maoy nakapahuman sa kampanya sa OKC sa Game 7 batok sa Golden State Warriors.
Wala siya buwagi sa OKC ug nakaduwa pa kauban sila Paul George ug Carmelo Anthony.
Sa 2016-17 season, nahimo siyang unang manlalaro sukad sa panahon ni Oscar Robertson niadtong 1962 nga naka-average og 31.6 puntos, 10.7 rebounds ug 10.4 assists kada duwa aron makuha ang Most Valuable Player award.
Nakarekord usab siya og 42 triple-doubles niadtong maong season.
Si Westbrook, nga siyam ka beses nga All-Star, adunay career average nga 20.9 puntos, 6.9 rebounds ug 8.0 assists kada duwa.
Naghupot siya sa rekord sa pinakadaghan nga career triple-doubles nga 209, nga milabaw sa rekord ni Robertson.
Gawas sa OKC, nakaduwa usab si Westbrook sa Houston Rockets, Washington Wizards, Los Angeles Lakers, LA Clippers, Denver Nuggets ug Sacramento Kings.
Sa iyang kataposang season, nakaduwa siya og 58 ka duwa alang sa Kings ug naka-average og 15.2 puntos, 6.7 assists ug 5.4 rebounds kada duwa.
Nagretiro siya nga ikalima sa kasaysayan sa NBA sa career assists, sunod nila John Stockton, Chris Paul, Jason Kidd ug LeBron James.
Siya usab ang ika-14 sa NBA career scoring list nga adunay 27,176 puntos, ug tulo lamang ka aktibong manlalaro ang naa sa iyang unahan, sila Durant, James ug Harden
