Gipanindigan ni House Committee on Appropriations Chairperson Rep. Mikaela Suansing nga walay insertions o pork barrel sa nasudnong pondo karong 2026, apil na ang gipanukalang pondo para sa sunod tuig.
Gipasiugda sa magbabatas nga “transparent” ang ilang mga gihimong deliberasyon sa nasudnong pondo para karong tuiga. Gipakita usab, matud niya, ang tanang institutional amendments nga gisulod sa pondo.
Alang sa gipanukalang pondo para sa 2027, gipatin-aw ni Rep. Suansing nga ang pagbalangkas sa National Expenditure Program o NEP anaa lamang sa hurisdiksyon sa ehekutibo.
Mariin usab niyang gilimod ang alegasyon nga adunay nasulod nga pork barrel o insertions sa gipanukalang pondo tungod kay sa pagkakaron, wala pa makita ug masusi sa Kongreso ang sulod sa NEP.
Gihimo ni Suansing ang maong pagpatin-aw human pormal nang gitunol sa Department of Budget and Management o DBM ngadto sa House of Representatives niadtong Agosto 11 ang gipanukalang P7.2 trilyong National Expenditure Program o NEP, o badyet sa Marcos administration alang sa fiscal year 2027.
Una nang gikuwestiyon ni House Justice Committee member Rep. Terry Ridon ang alegasyon sa insertions sa gipanukalang 2027 national budget, bisan pa nga wala pa magsugod ang deliberasyon sa komite ug wala pa kini makita sa mga kongresista ug senador.
Una nang giingon ni Baguio City Mayor Benjamin Magalong sa usa ka interbyu nga adunay pipila ka mga magbabatas nga giingong nakabenepisyo sa mga budget insertion ug mga miyembro sa House prosecution panel nga nagdumala sa impeachment trial batok kang Vice President Sara Duterte.
Kalabutan niini, gihagit ni Ridon ang alkalde nga nganlan ang mga iyang gipasabot nga nalambigit sa mga insertion sa pondo.
Bisan pa niini, gipasiugda ni Ridon, nga usa usab sa mga House prosecutor, nga dili sila matarog ug magpadayon sa pag-focus sa ilang trabaho.
