Nagpasidaan ang Department of Health o DOH sa publiko batok sa leptospirosis taliwala sa padayong pag-ulan ug pagbaha sa nagkadaiyang lugar sa nasud.
Gidasig sa DOH ang publiko nga likayan ang paglusong sa tubig-baha aron malikayan ang posibleng pagkatakod sa maong sakit.
Kon dili malikayan ang paglusong sa baha, gisugyot ang paggamit og botas ug hustong panalipod sa lawas. Mahimo usab nga mokonsulta sa doktor alang sa hustong tambag ug tambal, lakip ang doxycycline prophylaxis kon gikinahanglan.
Gipahinumdoman usab sa Palasyo ang publiko nga dili hulaton nga mograbe ang mga sintomas sama sa hilanat ug pagpanilaw sa mata o panit sa dili pa magpakonsulta sa doktor.
Gihimo ang pahimangno taliwala sa kaylap nga pagbaha sa Metro Manila ug ubang rehiyon tungod sa padayong pag-ulan nga dala sa gipalig-ong habagat.
