Wala mouyon ang Movie and Television Review and Classification Board (MTRCB) sa sugyot nga ipagbawal ang mga salida sa sine ug programa sa telebisyon nga adunay mapintas nga tema isip paagi aron maminusan ang mga krimen nga nalambigit sa mga menor de edad.
Una nang gisugyot ni Philippine National Police (PNP) Chief Gen. Jose Melencio Nartatez Jr. ang maong lakang human sa sunod-sunod nga insidente sa kapintasan sa mga eskwelahan.
Sumala kaniya, usa kini sa mga posibleng tun-an aron matubag ang nagkadaghang kaso sa kapintasan nga nalambigit sa kabatan-onan.
Apan sa usa ka pahayag, giingon sa MTRCB nga bisan giila nila ang kabalaka sa publiko bahin sa posibleng epekto sa mga bayolenteng salida ngadto sa mga kabatan-onan, dili nila makita nga ang pagdili niini mao ang hustong solusyon.
Gipadayag sa ahensya nga ang pagpanalipod sa mga bata batok sa makadaot nga sulod sa mga salida dili lamang responsibilidad sa gobyerno, kondili apil usab ang mga ginikanan, magtutudlo, media practitioners, digital content creators, ug mga stakeholder sa industriya sa pelikula ug telebisyon.
Matud pa sa MTRCB, aktibo silang nakigtambayayong sa mga naa sa industriya aron masiguro nga ang mga pelikula, programa sa telebisyon, ug uban pang materyales adunay mga leksyon nga nagpakita sa mga prinsipyo sa pagka-Pilipino, samtang gipasiugda ang responsable ug boluntaryong regulasyon sa paghimo og mga programa.
Dugang pa sa MTRCB nga ang pagdili sa mga salida ug programa nga adunay mapintas nga tema mahimong makalapas sa katungod sa mga Pilipinong tiglalang sa gawasnong pagpahayag.
