Usa ka 21-anyos nga Amerikano ang nakapakurat sa daghang tawo human niya masulbad ang 3x3x3 Rubik’s Cube sulod lamang sa 11.56 segundos bisan pa og nakapiring.
Tungod sa maong talagsaong nahimo niadtong Hunyo 28, nabawi pag-usab ni Tommy Cherry ang titulo sa Guinness World Records alang sa pinakapaspas nga pagsulbad sa 3x3x3 Rubik’s Cube samtang nakapiring.
Dili kini ang unang higayon nga nakab-ot niya ang maong rekord. Niadtong Agosto 5, 2021 sa Florida, una niyang nakuha ang titulo human masulbad ang cube sulod sa 15.27 segundos. Sukad niadto, padayon niyang gipauswag ang iyang kaugalingong rekord.
Nakat-on si Tommy sa pag-cube niadtong 2015 sa edad nga 11 anyos. Human sa usa lamang ka bulan nga pagpraktis, miapil dayon siya sa iyang unang kompetisyon. Pinaagi sa mga YouTube tutorials, nakakat-on usab siya sa teknik sa pagsulbad sa Rubik’s Cube bisan nakapiring.
Kung dili siya nakapiring, kaya niyang masulbad ang cube sulod sa mga 7 segundos, ug ang iyang personal best sa kompetisyon mao ang 4.53 segundos.
Matud ni Tommy, ang iyang kalampusan bunga sa walay hunong nga praktis, disiplina, ug dedikasyon. Gikan sa lokal nga mga kompetisyon, nakaabot siya sa world top 10 hangtod nahimong world record holder.
Gawas sa pagka-estudyante, nagtudlo usab siya og cubing ug nakasulay na sa lain-laing hagit sama sa one-handed solving ug foot solving. Plano pa niyang mopadayon sa pagtinguha og dugang pang world records sa kalibutan sa Rubik’s Cube.
