GENSAN-Gikumpirma ni General Santos City Lone District Rep. Shirlyn Bañas-Nograles nga andam na nga maablihan ug maagian sa publiko ang Mabuhay Underpass sa Hulyo 31 human mahuman ang nag-unang mga buluhaton sa proyekto.
Matud pa sa kongresista, nahuman na ang pagbutang ug pagsulay sa mga suga sa underpass, samtang hapit na usab mahuman ang access road.
Bisan pa man nga adunay pipila ka mga buluhaton nga may kalabotan sa panagway o aesthetic sa proyekto nga wala pa makompleto, mahimo na kining magamit sa publiko.
Nagpasalamat si Cong. Banas kang Department of Public Works and Highways (DPWH) Secretary Vince Dizon tungod sa pagtuman sa iyang saad nga mahuman ang proyekto sa takdang petsa nga Hulyo 31.
Gidayeg usab niya ang suporta sa DPWH Central Office ug District Office, ingon man ang kontribusyon sa QSTI ug ni Dr. Allan Botoyan, nga nagdumala sa geotechnical studies ug engineering response nga nakatabang sa pagpatuman sa proyekto.
Gipasalamatan usab sa kongresista ang contractor sa proyekto nga, bisan sa daghang wala damhang mga hagit, nakatuman gihapon sa ilang saad nga mahuman ang underpass sa gitakdang panahon.
