Giimbestigahan sa Department of Education (DepEd) ang kamatayon sa usa ka Grade 3 nga estudyante sa Lapulapu Elementary School sa Agdao District, Davao City, human sa gitahong insidente sa panaglalis sa mga estudyante.
Sumala sa inisyal nga report, usa ka Grade 3 nga estudyante ang namatay human giingong gibunalan sa ulo gamit ang notebook atol sa panaglalis sa sulod sa eskwelahan.
Sa usa ka opisyal nga pahayag nga gi-isyu sa DepEd niadtong Sabado, Hulyo 25, ang ahensya miingon nga ang DepEd Regional Office Xi, Schools Division sa Davao City ug administrasyon sa eskwelahan nakig-alayon sa mga awtoridad bahin sa gitaho nga insidente ug naghatag sa gikinahanglan nga tabang sa namatyan nga pamilya.
Gihatagan usab og psychosocial support ang mga estudyante ug mga kawani sa eskwelahan nga naapektuhan sa nahitabo.
Gipasiugda sa DepEd nga ang tanang angay nga child protection ug administrative procedures subay sa balaod gipatuman, samtang gisiguro ang due process ug ang pagpanalipod sa katungod sa tanang mga batang nalambigit sa insidente.
Giawhag usab sa departamento ang publiko nga likayan ang pagpakaylap sa mga espekulasyon ug wala mapamatud-i nga impormasyon samtang nagpadayon ang imbestigasyon.
