Misamot ang kusog sa Tropical Depression Kiyapo samtang nagpadayon kini sa paglihok sa kadagatan sa sidlakang bahin sa lalawigan sa Cagayan, sumala sa Philippine Atmospheric, Geophysical and Astronomical Services Administration (PAGASA).
Sa weather bulletin sa PAGASA alas-8:00 sa gabii niadtong Miyerkules, katapusang nakit-an ang sentro sa bagyo sa gilay-on nga 540 kilometro sa sidlakang amihanan-sidlakan sa Casiguran, Aurora.
Nagdala kini og kusog sa hangin nga moabot sa 55 kilometro kada oras duol sa sentro ug mga paghaguros nga moabot sa 70 kilometro kada oras. Naglihok kini paingon sa west-northwest sa gipaspason nga 30 kilometro kada oras.
Nagpabilin usab ang Tropical Cyclone Wind Signal (TCWS) No. 1 sa mosunod nga mga lugar:
-Batanes
-Cagayan, lakip ang Babuyan Islands
-Isabela
-Apayao
-Abra
-Kalinga
-Mountain Province
-Ifugao
-Ilocos Norte
-Ilocos Sur
-Amihanang bahin sa Aurora (Dilasag, Casiguran ug Dinalungan)
-Amihanang bahin sa Nueva Vizcaya (Bagabag, Diadi, Bayombong, Ambaguio, Villaverde, Quezon ug Solano)
-Amihanang bahin sa Quirino (Maddela, Cabarroguis, Saguday, Diffun ug Aglipay)
-Amihanang bahin sa Benguet (Buguias, Mankayan, Bakun ug Kibungan)
Sumala sa PAGASA, posible nga ipataas ang TCWS No. 2 isip pinakataas nga wind signal samtang motabok ang bagyo sa nasud.
Apan, wala usab gibaliwala sa ahensya ang posibilidad nga mataas kini ngadto sa TCWS No. 3 kon mosamot pa ang kusog sa bagyo ug mahimong severe tropical storm samtang moagi sa Batanes ug Babuyan Islands.
Gilauman nga moagi duol o posible pang mag-landfall ang Tropical Depression Kiyapo sa palibot sa Babuyan Islands tali sa Biyernes sa hapon hangtod sa Biyernes sa gabii.
Samtang, ang Habagat ug ang sirkulasyon sa bagyo padayon nga mopakusog sa hangin sa dakong bahin sa nasud.
Sa Biyernes, gilauman ang kusog hangtod gale-force nga hangin sa halos tibuok nasud, ilabina sa mga daplin sa baybayon ug kabukiran.
Pag-abot sa Sabado, gilauman nga masinati gihapon ang susamang kahimtang sa dakong bahin sa Luzon ug Visayas, lakip ang Zamboanga del Norte, Davao Oriental ug Dinagat Islands.
