Lima ka indibidwal ang gitaho nga nasamdan, lakip ang duha ka sundalo ug tulo ka sibilyan, human sa usa ka pagbuto nga nahitabo sa national highway sa Roundball, Barangay Mother Poblacion, Shariff Aguak, Maguindanao del Sur.
Nahitabo ang insidente kagahapong adlawa , Hulyo 18. Sumala sa impormasyon gikan sa Police Regional Office Bangsamoro Autonomous Region, ang mga personahe sa 2nd Special Reaction Battalion sa Philippine Army nagsakay sa usa ka trak sa militar ug padulong sa lungsod sa Isulan sa dihang nahitabo ang insidente.
Ang imbestigasyon nagbutyag nga duha ka wala mailhing lalaki nga nagsakay sa itom nga motorsiklo ang giingong naglabay og butang nga gituohang granada sa sakyanan sa wala pa mahitabo ang pagbuto.
Tungod sa insidente, ang duha ka sundalo ug tulo ka sibilyan nakaangkon og mga samad sa shrapnel ug dali nga gidala sa Bangsamoro Regional Hospital and Medical Center. Nakuha sa mga awtoridad ang safety lever sa gituohang granada gikan sa lugar.
Nakigtambayayong na karon ang mga awtoridad sa Provincial Forensic Unit ug PCEU sa Maguindanao Del Sur alang sa usa ka hingpit nga imbestigasyon, samtang nagpahigayon usab og dragnet operations aron mailhan ug madakpan ang duha ka suspek.
