Nahimong hisgutan sa social media ang TV host nga si Mariel Padilla human namatikdan sa pipila ka netizens nga wala na sa iyang Instagram following list ang mga aktres nga sila Angel Locsin ug Anne Curtis.
Sumala sa mga netizen, nawala sa listahan sa gi-follow ni Mariel ang duha ka aktres human mahimong viral ang mensahe ni Angel para sa bana ni Mariel nga si Senator Robin Padilla.
Kung susihon ang Instagram account ni Mariel, dili na makita ang mga ngalan nila Angel ug Anne sa iyang following list. Samtang sa accounts nila Angel ug Anne, nagpabilin pa gihapon nga naka-follow ang duha kang Mariel hangtod alas-11:49 sa gabii niadtong Hulyo 17.
Nadugtong usab ang ngalan ni Anne Curtis sa isyu tungod sa iyang komentaryo sa post ni Angel diin iyang gipakita ang suporta sa aktres, pinaagi sa mensahe nga, “Welcome back Mars, ay Darna pala.”
Nahimong sentro sa atensyon si Angel Locsin human siya mipagawas og taas nga pahayag bahin sa iyang pagkadismaya sa pipila ka baruganan ni Senator Robin Padilla, lakip ang mga isyu kabahin sa red-tagging, suporta kang Kingdom of Jesus Christ founder Pastor Apollo Quiboloy, ug mga pahayag may kalabotan sa China ug West Philippine Sea.
