Nahimong hulga sa mga residente sa Hengzhou City sa Guangxi Region, China ang gatusan ka mga halas nga nakabuhi human sa grabeng pagbaha nga gipahinabo sa Bagyong Maysak.
Sumala sa state media, mokabat sa 900 ka mga halas, lakip ang mga makahilo nga cobra, ang nakagawas gikan sa mga snake breeding farms nga nalumos sa baha. Usa ka babaye ang namatay human mapaakan sa gituohang cobra, samtang adunay ubang residente nga napaakan usab.
Nagpakita ang mga video nga gipatik sa mga residente og mga halas nga naglangoy-langoy sa mga kalsada nga gibahaan, hinungdan sa dakong kabalaka sa komunidad.
Tungod niini, gipagawas sa mga awtoridad ang pasidaan ngadto sa publiko nga likayan ang mga dapit nga adunay taas nga sagbot ug mga lugar nga gibahaan diin kasagarang motago ang mga halas.
Gipalig-on usab sa lokal nga kagamhanan ang operasyon sa mga snake-catching teams, samtang gidugangan ang stock sa antivenom sa mga ospital aron maandam sa posibleng pagdagsa sa mga biktima sa paak sa halas.
Sa pagkakaron, giingon sa usa ka miyembro sa snake-catching team nga nakadakop na sila og tali sa 2,000 hangtod 3,000 ka mga halas sulod lamang sa duha ka adlaw, kadaghanan niini mga rat snake nga dili makahilo.
Padayon ang pagmonitor sa mga awtoridad sa kahimtang samtang nagpaubos na ang baha, aron masiguro ang kaluwasan sa mga residente ug malikayan ang dugang nga mga insidente sa paak sa halas.
