GENSAN- Wala molungtad og dugay ang pag-ikyas sa suspek sa pagpanigbas-patay sa usa ka 20-anyos nga laborer sa Barangay Labangal human kini malampusong nasikop sa kapulisan atol sa hot pursuit operation.
Ang biktima giila nga si Jonel Confesor Bermudez, residente sa Purok San Roque, Barangay Labangal. Nahitabo ang krimen pasado alas-2:00 sa kaadlawon sa maong lugar.
Sumala kang Police Major Ari Noel Cardos, hepe sa Makar Police Station, gilayon nilang gipadayon ang operasyon human madawat ang report sa insidente, nga misangpot sa pagkasikop sa giingong responsable. Sa pagkakaron, anaa na sa kustodiya sa kapulisan ang suspek samtang giandam na ang tukmang kaso nga ipasaka batok kaniya.
Sa inisyal nga imbestigasyon, nasayran nga nakita pa ang biktima nga nagkaon og pastil sa wala pa ang insidente. Pipila ka gutlo ang milabay, nakadungog og kusog nga lagubo ang mga residente, ug sa ilang pagsusi, ilang nakita ang biktima nga nagkadugo na diha sa basketball court.
Nakaangkon ang biktima og samad tungod sa tinigbas sa tangkugo ug liog, nga maoy hinungdan sa iyang dihadiha nga kamatayon.
Samtang nagpadayon ang imbestigasyon, gibutyag ni Police Major Cardos nga usa sa mga anggulong ilang gisusi mao ang posibleng pagpanimalos. Gisuta usab nila ang impormasyon nga ang biktima kaniadto nalambigit sa kagubot sa maong lugar ug adunay naunang kaso sa dihang menor de edad pa kini.
Nagpadayon ang lawom nga imbestigasyon sa Makar Police Station aron mahibal-an ang tinuod nga motibo sa krimen ug mapanubag sa balaod ang responsable.(Report by Bombo Irish Losorata)
