Gikumpirma sa US Central Command nga nahuman na sa militar sa Estados Unidos ang ilang bag-ong hugna sa mga pag-atake batok sa Iran.
Matud sa US military, gibanabana nga mokabat sa 90 ka military targets ang naigo sa maong operasyon.
Sa usa ka pahayag sa X, giingon sa Centcom nga naigo sa pwersa sa Estados Unidos ang mga air defense systems, coastal surveillance assets, mga pasilidad sa pagtipig sa missile ug drone, naval capabilities, ug military logistics infrastructure sa baybayon sa Iran.
Ang bag-ong serye sa mga pag-atake sa US gisundan human sa ilang malampusong opensiba batok sa Iran sa miaging mga adlaw.
Gipasabot sa US military nga tumong sa ilang gilunsad nga strikes mao ang pagpaluya pa sa abilidad sa Islamic Republic of Iran sa pag-atake sa mga komersyal nga barko ug mga inosenteng sibilyan nga tripulante nga moagi sa Strait of Hormuz.
Niadtong Miyerkules (oras sa Estados Unidos), gipahibalo ni US President Donald Trump nga natapos na ang tigpahunong sa panagsangka tali sa Estados Unidos ug Iran human sa mga pag-atake sa Iran batok sa mga barkong naglawig sa Strait of Hormuz.
