Misamot ang tensyon sa ikaduhang adlaw sa impeachment trial ni Vice President Sara Duterte human kuwestiyonon sa kampo sa depensa ang testimonya sa usa ka saksi gikan sa National Bureau of Investigation o NBI.
Atol sa pagdungog, gipangutana sa prosecution si NBI Cybercrime Investigation Unit Senior Agent John Mark Calilung bahin sa screenshot ug printout sa usa ka pahayag sa Armed Forces of the Philippines. Gipamatud-an sa saksi nga parehas ang sulod sa duha ka dokumento.
Apan, misukol ang abogado sa depensa nga si Carlo Narvasa ug gipangutana kung giunsa sa saksi pag-ingon nga parehas ang mga dokumento, ilabina kay ang printout anaa na sa panig sa depensa. Giingon usab ni Narvasa nga daw nagsunod lamang sa usa ka script ang saksi.
Dali usab nga mitubag ang prosecution. Gihangyo ni House prosecutor Virgil Ligutan sa impeachment court nga ipatangtang sa rekord ang maong pahayag sa depensa. Matod niya, gisusi una sa saksi ang dokumento sa dili pa kini ihatag sa depensa, busa walay basehan ang giingong nagsunod lamang kini og script.
Padayon usab nga gipresenta sa prosecution ang ilang mga ebidensiya may kalabotan sa ikaupat nga artikulo sa impeachment, lakip ang mga video clip sa giingong mga pahayag ni Vice President Duterte nga naglangkob sa mga hulga batok kang Pangulong Ferdinand Marcos Jr., First Lady Liza Araneta-Marcos, ug kanhi House Speaker Martin Romualdez.
