Nagpasidaan ang Commission on Elections (Comelec) sa publiko batok sa mga peke nga e-mail nga nagpakaaron-ingnon nga gikan sa ahensya aron makakuha og personal o sensitibo nga impormasyon.
Espesipikong gikutlo sa Comelec ang e-mail address nga comelec.infoupdate@protonmail.com ug usa ka indibidwal nga nag-angkon nga empleyado sa Comelec.
Giklaro usab sa ahensya nga wala kini Stakeholder Relations Division ug walay empleyado o direktor nga ginganlag Atty. Maria Carmela B. Gonzales. Ang opisyal nga e-mail sa Comelec naggamit lamang sa domain nga @comelec.gov.ph.
Gitambagan usab ang publiko nga dili dayon mag-klik sa mga link sa mga kadudahang e-mail tungod kay kini mahimong mga phishing scam nga nagtumong sa pagpangawat og impormasyon.
Para sa opisyal nga komunikasyon, gamita lamang ang e-mail nga gilista sa seksyon nga “Contact Us” sa website sa Comelec o bisitaha ang ilang mga opisina.
