Gipasidan-an ni Senador Erwin Tulfo ang mga kompanya sa kuryente batok sa posibleng pagpahimulos sa epekto sa Super El Niño pinaagi sa dili makatarunganong pagsaka sa singil ug paghatag og ubos nga kalidad sa serbisyo.
Sumala kang Tulfo, chairman sa Senate Committee on Energy, kinahanglan nga patas ug makatarunganon ang bisan unsang pagsaka sa taripa sa kuryente, ilabi na kay dako na ang gasto sa mga pamilyang Pilipino.
Matod sa senador, andam siyang gamiton ang gahum sa Senado aron imbestigahan ang mga kompanya sa pagmugna ug pag-apod-apod sa kuryente kung mapamatud-an nga gipahimuslan niini sa krisis aron madugangan ang ilang kita.
Giawhag usab ni Tulfo ang Department of Energy o DOE ug Energy Regulatory Commission o ERC nga magpatuman og konkretong mga lakang aron mapanalipdan ang mga konsumidor batok sa pagsaka sa singil ug posibleng rotating brownout.
Gipasiugda sa senador nga kinahanglan paspason ang mga plano aron masiguro ang igo ug lig-on nga suplay sa kuryente, lakip ang pagpugong sa artipisyal nga kakulang sa suplay nga mahimong gamiton nga rason sa pagpataas sa presyo.
Gilauman base sa forecast sa PAGASA nga mokusog ang El Niño ug mahimong moabot sa lebel nga Very Strong tali sa Septyembre ug Disyembre 2026, ug posibleng magpadayon hangtod sa unang katunga sa 2027.
Tungod niini, gipadayag ni Tulfo nga kinahanglan unahon sa sektor sa enerhiya ang interes sa publiko pinaagi sa pagsiguro sa igo nga suplay sa kuryente ug paglikay sa dili makatarunganong dugang nga palas-anon sa mga konsumidor.
