Giisip karon ni Vice President Sara Duterte ang kalit nga pagpahigayon og rally sa Iglesia ni Cristo sa bahin sa EDSA White Plains isip pagpamatuod sa iyang dugay nang mga reklamo sukad pa niadtong 2024.
Matod sa Bise Presidente, nagpakita lamang kini nga adunay kahuyang sa pagpangulo ang kasamtangang administrasyon. Giingon niya nga wala matubag ug wala mailhi sa gobyerno ang tinuod nga mga problema nga giatubang sa katawhan.
Lakip sa iyang gihisgutan ang padayon nga pagsaka sa presyo sa mga palaliton, kakulang sa trabaho, ug ang giingong kakulang sa pagtagad ni Pangulong Ferdinand Marcos Jr. sa mga reklamo sa publiko.
Giakusaran usab sa Bise Presidente ang administrasyong Marcos nga gigamit ang justice system aron pasakaan og kaso ug ipapriso ang mga indibidwal nga mosaway sa gobyerno.
Nasayran nga pipila ka libong miyembro sa INC ang kalit nga nagpahigayon og protesta sa EDSA-White Plains usa ka adlaw human gipahibalo sa Office of the Ombudsman ang pag-andam sa kaso sa plunder batok kang Senador Rodante Marcoleta.
