Nagdumili si Department of Justice (DOJ) Secretary Frederick Vida sa pagkomento kon kinahanglan ba usab nga mobalik o magbayad og restitution si kanhi Department of Public Works and Highways (DPWH) Secretary Manuel Bonoan sa giingong kinawat nga bahandi.
Sa iyang pahayag, miingon si Vida nga “no comment” siya sa maong isyu, human sa gipahayag ni Ombudsman Jesus Crispin “Boying” Remulla nga gusto nilang himuong state witness si Bonoan.
Giangkon usab sa kalihim sa DOJ nga wala siya’y kahibalo kon aduna na ba’y nauli o nabayran nga giingong kinawat nga bahandi ang kanhi kalihim.
Giklaro usab ni Vida nga wala nay pending nga kaso batok kang Bonoan sa DOJ, ug ang pagdumala sa kaso batok sa mga opisyal nga giakusahan og korapsyon anaa na karon sa Office of the Ombudsman.
Matud pa ni Ombudsman Remulla sa iyang miaging press briefing, nagsumite na sila og mosyon aron tantangon si Bonoan isip akusado sa mga kaso ug mahimo siyang state witness sa nagpadayon nga imbestigasyon sa giingong flood control scandal.
