GENSAN- Padayon pa gihapon ang gihimong assessment sa mga inspector sa Office of the Building Official (OBO) sa mga nagkadaiyang gambalay dinhi sa siyudad sa General Santos human sa nahitabong linog.
Sumala sa gipahayag sa kadagkoan sa OBO, wala pa’y pormal nga kamandoan gikan sa ilang labaw ug sa ehekutibo nga undangon ang inspeksyon, hinungdan nga anaa gihapon sa gawas ang ilang mga personahe aron masiguro ang kaluwasan sa publiko.
Gidugang usab nga lahi ang buluhaton sa City Engineer’s Office, diin sila ang nag-evaluate sa mga government projects ug estraktura sa gobyerno, samtang ang OBO usab ang nagatutok sa pag-inspeksyon sa mga pribadong establisimento ug building.
Gi-update usab sa buhatan ang kahimtang sa mga dagkong mall sa siyudad nga nangayo og pagtugot nga makaabri og balik sa ilang mga grocery section o supermarket.
Adunay mga mall nga gihatagan na og “green tag” human masuta sa mga inspector nga luwas ug okay na kini nga sudlan, samtang usa ka mall usab ang kasamtangang napaubos sa “yellow tag”.
