GENSAN- Gipangunahan ni Pangulong Ferdinand Marcos Jr. ang usa ka situational briefing ning adlawa uban sa mga kalihim sa nagkalain-laing ahensya sa gobyerno aron paminawon ang mga report gikan sa mga lokal nga opisyal sa General Santos City ug Sarangani Province kabahin sa epekto sa magnitude 7.8 nga linog.
Atol sa briefing, gihatagan sa mga mayor, governer ug vice governer ang Pangulo og beripikado nga datos mahitungod sa kadaot nga nahatag sa linog ug sa nagpadayong mga lakang sa relief, rehabilitasyon ug pagbangon sa mga apektadong komunidad.
Gipahibalo ni General Santos City Mayor Lorelie Pacquiao sa Pangulo ang kasamtangang kahimtang sa siyudad ug mihangyo og dugang suporta gikan sa nasudnong gobyerno aron mapadayon ang relief operations ug paghatag og ayuda sa mga residente. Isip tubag, giaprobahan sa Malacañang ang dugang pinansyal nga tabang alang sa mga apektadong lokal nga kagamhanan.
Makadawat og ₱50 milyon ang General Santos City ug Sarangani Province, samtang ₱30 milyon matag usa ang South Cotabato ug Sultan Kudarat.
Makadawat usab og lain-laing kantidad sa ayuda ang ubang lalawigan ug lungsod nga naapektuhan sa linog. Gawas niini, maggahin ang Tanggapan sa Pangulo og kinatibuk-ang ₱262 milyon ubos sa Local Government Support Fund alang sa mga prayoridad nga proyekto sa SOCCSKSARGEN, lakip ang ₱140 milyon para sa Sarangani ug ₱122 milyon para sa South Cotabato.
Nagpasalamat si Mayor Pacquiao sa nasudnong gobyerno tungod sa dugang nga suporta nga makatabang sa paghatag og dinaliang serbisyo ug sa pagpadali sa rehabilitasyon ug pagbangon sa General Santos City human sa makusog nga linog.
