Gihangyo ni Bise Presidente Sara Duterte ang Senate Impeachment Court nga ibasura ang Articles of Impeachment batok kaniya, nga iyang giangkon nga adunay ‘fatal constitutional, procedural, and substantive defects.”
Sa usa ka taas nga tubag nga gisumite sa iyang mga abogado sa Senado kagahapong adlawa , si Duterte miingon nga ang reklamo giingong wala makatuman sa mga sumbanan sa Konstitusyon ug kinahanglan nga ibasura.
Usa sa mga nag-unang argumento sa kampo sa Bise Presidente mao ang giingong sobra nga awtoridad sa House Committee on Justice, human kini nagpahigayon sa gitawag niini nga “mini-trial” sa pagdungog sa kaso.
Sumala sa depensa, ang House lamang ang adunay gahum sa pagsugod sa mga proseso sa impeachment, samtang ang Senado ang responsable sa pagrepaso ug pagdesisyon sa kaso.
Gipahayag usab sa kampo ni Duterte nga ang patas nga proseso naapektuhan sa mga pahayag sa pipila ka mga magbabalaod nga sila adunay igo nga mga boto alang sa impeachment ug nga ang ebidensya batok kaniya lig-on bisan sa wala pa matapos ang hearing.
Sumala sa ilang tubag, ang katungod sa Bise Presidente sa due process nalapas usab tungod kay ang bag-ong ebidensya gipresentar atol sa hearing nga giingong wala gilakip sa orihinal nga reklamo.
Hugot usab nga gihimakak ni Duterte ang mga pasangil nga may kalabotan sa giingong sayop nga paggamit sa kompidensyal nga pondo, wala matino nga bahandi, ug paglapas sa Statement of Assets, Liabilities and Net Worth (SALN).
Giinsistir sa iyang kampo nga wala pa’y pinal nga desisyon gikan sa bisan unsang korte nga nagpamatuod sa graft, corruption, plunder, o bisan unsang iregularidad sa paggamit sa pondo.
Dugang pa, ang Articles of Impeachment giingong napakyas sa pagpamatuod sa bisan unsang konstitusyonal nga basehan aron pamatud-an nga siya sad-an, lakip ang culpable violation of the Constitution, bribery, graft and corruption, high crimes, o pagbudhi sa pagsalig sa publiko.
