Nakapalingaw sa mga netizens ang talagsaong kinaiya sa usa ka farm goat nga ginganlag “Billy Goat” human kini nakita nga nag-huyop ug kalayo sama sa ginabuhat sa mga tawo aron nga makaluto ug pagkaon
Sa viral nga video, makita si Billy Goat nga maampingong naghuyop sa dapogan gamit ang hangin sa iyahang baba. Sumala sa tag-iya, si Billy Goat usa ka bihuhing kanding nga gipadako sa ilang caretaker nga si Bobong kauban sa mga iro sa umahan.
Matud pa nila, gawas sa sagbot, ganahan usab mokaon si Billy Goat og kan-on ug kasagarang mosunod sa ginabuhat sa mga iro nga iyang kauban sukad gamay pa kini.
Tungod sa iyang pagdako uban sa mga iro, murag nagtuo na usab si Billy Goat nga usa siya kanila. Dili usab kini kasagaran moduol o mokuyog sa ubang mga kanding tungod kay murag dili niya kini “kauri.”
Nakatawa na lang ang mga netizens sa komentaryo sa tag-iya nga basin kinahanglan na kuno nila ipa-atubang si Billy Goat sa salamin aron mahibal-an nga kanding diay siya ug dili iro.
Daghan usab ang nalingaw ug niingon nga si Billy Goat usa ka “certified doggo trapped in a goat’s body,” samtang ang uban miingon nga klaro kaayo nga naapektohan kini sa iyang environment ug mga kauban sa pagdako.
Bisan pa man, nahimong instant good vibes sa social media si Billy Goat tungod sa iyang kataw-anan apan makahigugmang kinaiya.
