Nagpatuman ang Senado og mas hugot nga mga lakang sa seguridad subay sa gitakdang deadline para kang Bise Presidente Sara Duterte sa pagsumite sa iyang tubag sa Articles of Impeachment.
Sumala sa pahibalo, ang Bise Presidente adunay hangtod alas 7 sa gabii sa Hunyo 1 aron isumite ang iyang tubag, personal man, pinaagi sa abogado, o pinaagi sa electronic mail.
Mahinumduman nga ang summons pormal nga gi-serve kang Duterte niadtong Mayo 20, duha ka adlaw human ang Senado nagtigom isip impeachment court.
Ang impeachment trial gilauman nga magsugod sa Hulyo 6 diin si Duterte mag-atubang og mga kaso sa culpable violation of the Constitution, graft and corruption, ug betrayal of public trust.
Tungod sa gipaabot nga pagdagsa sa media ug mga tigpaluyo ug kritiko sa Bise Presidente, ang Office of the Senate Secretary naglatid og mga giya para sa media coverage ug mga gitudlo nga lugar diin ang kampo ni Duterte mahimong magpahigayon og mga press briefing.
Sumala sa Senado, ang mga lakang gitumong sa pagsiguro sa usa ka hapsay, luwas ug episyente nga proseso sa pagsumite sa tubag samtang naghatag usab sa media og igong access sa importanteng kalihokan.
Ang National Capital Region Police Office (NCRPO) nakig-alayon sa Office of the Sergeant-at-Arms aron masiguro ang kahusay sa Senado.
Samtang ang mga pulis na-deploy sa gawas sa bilding sulod sa pipila ka semana tungod sa mga protesta sa lain-laing grupo nga adunay lain-laing baruganan sa kaso sa impeachment ni Duterte ug uban pang mga isyu nga giatubang sa Senado.
Samtang, ubos sa Rules of Procedure sa Impeachment Trial, ang prosecution panel adunay lima ka adlaw sa pagsumite sa ilang tubag human madawat ang tubag sa Bise Presidente
