Gilauman sa outgoing Regional Director sa Police Office 12 nga si P/BGen Arnold Ardiente nga magpadayon ang mga programa ug kampanya sa PRO-12 ubos sa bag-ong liderato ni P/BGen Allan Manibog aron mapreserba ang kalinaw ug kahusay sa SOCCSKSARGEN region. Samtang mainiton usab nga gi-welcome sa kapulisa sa rehiyon 12 ang bag-ong labaw sa PRO 12 nga si P/BGen Manibog.
Gani, ang Philippine National Police nagpahigayon sa Ceremonial Joint Turnover and Assumption of Office kagahapon, Mayo 22, 2026 sa Camp BGen Rafael T Crame, Quezon City, nga nagpasiugda sa padayon nga pasalig niini sa pagpadayon sa liderato, kalig-on sa organisasyon, ug pagpalig-on sa kapasidad sa operasyon.
Ang seremonya gipangulohan ni Police General Jose Melencio C. Nartatez Jr., Hepe sa Philippine National Police, ug gitambongan sa mga miyembro sa Command Group, Directorial Staff, mga senior officer, mga personahe gikan sa lain-laing mga unit sa tibuok organisasyon, ug ang mga pamilya sa mga outgoing ug incoming nga mga opisyal.
Sa wala pa ang iyang bag-ong assignment, nagsilbi si Manibog isip deputy for operations sa PNP National Headquarters ug nahimong kabahin sa imbestigasyon sa usa ka high-profile nga insidente sa pagpamusil sa Senado sa miaging mga tuig.
Matud sa PNP, kabahin ang reorganisasyon sa regular reassignment program aron mapalig-on ang liderato, koordinasyon, ug operasyon sa lain-laing rehiyon sa nasud.
