Girekomendar sa Field Investigation Bureau sa Ombudsman ang pagsaka og kasong plunder ug indirect bribery batok kang Sen. Rodante Marcoleta human siya giingong nakadawat og P75 milyon isip campaign donations niadtong miaging tuig.
Base sa complaint-affidavit nga gipirmahan niadtong Mayo 18, gusto sa mga imbestigador nga kasuhan si Marcoleta og plunder kauban si kanhi Quezon City 2nd District Representative Mike Defensor ug duha pa ka indibidwal nga giingong naghatag og donasyon sa senador.
Kabahin ang rekomendasyon sa mas halapad nga imbestigasyon sa Ombudsman kalabot sa paggamit sa campaign funds ug posibleng paglapas sa balaod batok sa korapsyon.
Sa pagkakaron, wala pay pahayag gikan sa kampo ni Marcoleta kalabot sa maong reklamo. Ingon man, wala pa usab magpagawas og pahayag ang uban pang mga indibidwal nga nalambigit sa kaso.
Ang kasong plunder usa sa labing bug-at nga kasong kriminal ubos sa balaod, nga adunay silot nga pagkabilanggo sulod sa tibuok kinabuhi kon mapamatud-an nga sad-an.
Wala usab kini’y gitakdang piyansa alang sa temporaryong kagawasan.
Samtang ang bribery nagtumong sa ilegal nga pagdawat og pabor o kuwarta isip puli sa impluwensiya o gahum.
